Jaza lagérida jan üzgen méhri’ay erkinning yaponiyede oqush jeryanida ishtin sirt ana til oqutushi bilen meshghul bolup perzentlerning söygüsi we ata-anilarning qollishigha na’il bolghanliqini eslesh we xitay jaza lagérlirigha qamalghan minglighan ana til oqutquchilirining töhpisini xatirilesh, muhajirettiki Uyghur perzentlerde ana til söygüsini küchlendürüsh, ata-anilarning ana tilgha bolghan diqqet étibarini qozghash, muhajirettiki ana til oqutushini téximu qizghin, keng we izchil qanat yaydurush üchün, yaponiye Uyghur jem’iyiti «méhri’ay erkin ana til mukapati» tesis qilghan idi. Üchinchi qétimliq «méhri’ay erkin ana til mukapati»gha iltimas qilish 12-ayning 1-küni resmiy bashlandi.
Mukapat ikki tür boyiche tarqitilidu: birinchisi, bir neper ana til ögetküchi, yeni mu’ellimge; ikkinchisi, ikki neper ana til ögen’güchi, yeni bashlan’ghuch mektep yéshidiki balilargha.
Mu’ellimge qoyulidighan telep: ana til oqutushta 1) oqughuchilarning alqishigha érishken bolush; 2) yéngiliq yaratqan bolush; 3) musteqil derslik, meshiq we ögitish usuli yaratqan bolush yaki shundaq usullarni özleshtürgen bolush; 4) oqutush süpiti barghanséri ösken bolush, oqughuchi sani izchil köpeygen bolush.
Oqughuchigha qoyulidighan telep: ana tilni izchil ögen’gen bolush, ana til netijisini ijtima’iy taratqular, neshr epkarlar we Uyghurche sorunlarda ispatlighan bolush, Uyghurche türlük musabiqilerde netije qazan’ghan bolush, ana til öginishte teshebbuskar bolghan bolush, bashqilarning ana til öginishige türtke bolghan bolush.
Mukapatlash usuli: teqdirname we neq pul mukapat (mu’ellimge 100,000 yén, oqughuchigha 50,000 yén) bérilidu
Mukapatlaydighan orun: Yaponiye Uyghur Jem’iyiti
Mukapat tarqitish waqti: her yili méhri’ayning tughulghan küni bolghan 23-féwral küni tarqitilidu (üchinchi qétimliq «méhri’ay erkin ana til mukapati» 2024-yili 23-féwral tarqitilidu)
Iltimas qilish waqti: 2023-yili 12-ayning 1-künidin 2024-yili 1-ayning 22-künigiche
Iltimas qilish usuli: tor betning sol terep üstidiki «iltimas qiling» dégen tallashni chékip iltimas qilish bétige kiring, andin «isim-familisi», «élxet adrési», «téma», «iltimas qilmaqchi bolghan tür» we «mezmun» qatarliqlarni toldurup, munasiwetlik höjjetlerni yüklep «ewetish» kunupkisini bassingiz bolidu. Iltimas qilghanda her qaysi döletlerdin ata-anilar we ana til mektepliri, ana til mes’uli, ana til oqutquchiliri iltimas qilghuchi oqutquchi yaki oqughuchini tewsiye qilip iltimas qilsimu bolidu
Alahide eskertish: iltimas qilghuchilarning shexsiy uchurliri hergiz ashkarilanmaydu, iltimas qilghuchilarning tizimliki torda élan qilinmaydu, iltimas qilghuchilar xatirjem iltimas qiliwerse bolidu
